پاکستان تحریک انصاف (پی ٹی آئی) کی جانب سے شوکاز نوٹس موصول ہونے کے بعد منحرف رکن قومی اسمبلی غفار وٹو کا ویڈیو بیان سامنے آگیا۔
2018 کے انتخابات میں آزاد حیثیت سے کامیابی حاصل کرنے کے بعد پی ٹی آئی میں شامل ہونے والے غفار وٹو نے اپنے ویڈیو بیان میں کہا کہ انہوں نے 2018 میں آزاد حیثیت میں حلقہ این اے 166 بہاولنگر سے کامیابی حاصل کی تھی۔
غفار وٹو نے کہا کہ میں نے الیکشن جیت کر پی ٹی آئی میں شمولیت اختیار کی، ان ساڑھے تین سالوں میں وہ اپنے حلقے میں ایک کام نہیں کر سکے۔
انہوں نے کہا کہ میرا مطالبہ تھا کہ میرے حلقے کو سی پیک اور موٹروے سے منسلک کیا جائے، جب ہمارا کام نہیں ہوتا اور ہم ناراضگی کا اظہار کرتے ہیں تو الزامات لگائے جاتے ہیں۔
غفار وٹو نے یہ بھی کہا کہ مجھ پر کروڑوں روپے لینے کا الزام لگایا گیا، پیسے لینے والے پر لعنت بھیجتا ہوں، رشوت لینے والا جہنمی ہے۔
انہوں نے مزید کہا کہ میں کبھی سندھ ہاؤس نہیں گیا، مجھ پر سندھ ہاؤس میں ہونے کا الزام لگایا گیا۔
واضح رہے کہ پی ٹی آئی کے 14 منحرف ارکان کو شوکاز نوٹس جاری کیے گئے تھے جن میں نور عالم خان، افضل ڈھانڈلہ، نواب شیر، راجہ ریاض، احمد حسین ڈیہر، رانا قاسم نون، غفار وٹو اور باسط بخاری شامل ہیں۔