کے ڈی اے میں کر کٹ، ہاکی ٹیموں کی بحالی

کراچی میں وزیر بلدیات سید ناصر حسین شاہ کی زیر صدارت کے ڈی اے کی گورننگ باڈی کے اجلاس میں ناصر حسین شاہ نے محکمے میں کرکٹ اور ہاکی ٹیمیں بنانے کا اعلان کیا اور کھلاڑیوں میں تقرری نامہ تقسیم کیا۔

اس موقع پر وزیر بلدیات نے کہا کہ ماضی میں کراچی ڈویلپمنٹ اتھارٹی کی جانب سے کھیلوں کی سرگرمیاں ختم کرنا ادارے کی بدقسمتی ہے۔ حکومت نوجوانوں کو غیر اخلاقی سرگرمیوں سے بچانے کے لیے کھیلوں کی سرگرمیوں کو فروغ دینا چاہتی ہے۔

کے ڈی اے میں کرکٹ اور ہاکی ٹیموں کا قیام اسی سلسلے کی ایک کڑی ہے۔ ڈائریکٹر جنرل کے ڈی اے سید محمد علی شاہ نے کہا کہ جلد ہاکی اور کرکٹ ٹورنامنٹ کا انعقاد کیا جائے گا۔ حکومتی پالیسی کے مطابق کھلاڑی پرفارمنس دیں گے تو ادارہ مراعات بھی دے گا۔ کھلاڑیوں کو دیئے گئے تقرری خطوط کے مطابق ماہانہ وظیفہ بھی دیا جائے گا۔

اس موقع پر سیکرٹری لوکل گورنمنٹ سید نجم شاہ، ممبر فنانس کے ڈی اے شجاعت حسین، سیکرٹری کے ڈی اے شمس صدیقی، کے ڈی اے لیبر یونین کے سرپرست محمد اشرف، ڈائریکٹر سپورٹس ایاز منشی، سپرنٹنڈنٹ انجینئر طارق رفیع اور سپورٹس آرگنائزر محمد نسیم بھی موجود تھے۔ موجود تھے۔

کھلاڑیوں نے کہا کہ کے ڈی اے نے اپنے پلیٹ فارم سے ہماری حوصلہ افزائی کرکے بہت اچھا کام کیا ہے۔ موجودہ حالات میں مالی تعاون کے بغیر کھیل کے میدان پر مستقل مزاجی کے ساتھ کارکردگی کا مظاہرہ کرنا ممکن نہیں۔ ہم اپنے محکمہ کے ذریعے کھیل کے میدان میں صوبے اور ملک کا نام روشن کرنے کی بھرپور کوشش کریں گے۔