کنگنا رناوت کی فلم ’’ایمرجنسی‘‘ پہلا ٹیزر جاری ہوتے ہی تنازعے کا شکار

ممبئی (مانیٹرنگ ڈیسک) متنازعہ بیانات کے لیے شہرت رکھنے والی کنگنا رناوت کی نئی فلم ’ایمرجنسی‘ کا پہلا ٹیزر ریلیز ہوتے ہی تنازع کا شکار ہو گیا۔ کنگنا رناوت بھارت کے ممتاز سیاستدان، بھارت کے پہلے وزیر اعظم جواہر لعل نہرو کی بیٹی اور سابق وزیر اعظم اندرا گاندھی کی زندگی پر فلم بنا رہی ہیں، جس میں 1975 سے 1977 کے درمیان بھارت میں لگائی گئی ’ایمرجنسی‘ کو موضوع بنایا گیا ہے۔ فلم کی ایک اور خاص بات یہ ہے کہ کنگنا اس میں نہ صرف اندرا گاندھی کا کردار ادا کر رہی ہیں بلکہ وہ فلم کی رائٹر اور ڈائریکٹر بھی ہیں۔ فلم کے پہلے ٹیزر میں کنگنا ہوبھو اندرا گاندھی کو دکھایا گیا ہے جس کا سہرا آسکر ایوارڈ یافتہ ڈیوڈ مالینووسکی کو جاتا ہے۔ ہمیشہ کسی نہ کسی تنازع کا شکار رہنے والی کنگنا رناوت کی فلم ’’ایمرجنسی‘‘ کا پہلا ٹیزر بھی تنازع کا شکار ہوگیا۔ مہاتما گاندھی کی کانگریس پارٹی جس کی قیادت اب اندرا گاندھی کی بہو اور ان کے بیٹے کے پاس ہے۔ پارٹی نے کنگنا رناوت کی اندرا گاندھی کی تصویر کشی پر اعتراض کیا اور مطالبہ کیا کہ فلم کی ریلیز سے پہلے انہیں دکھایا جائے۔ مدھیہ پردیش کانگریس کے میڈیا ڈیپارٹمنٹ کی نائب صدر سنگیتا شرما نے کنگنا رناوت کو بی جے پی کی ایجنٹ قرار دیتے ہوئے کہا کہ یہ فلم سابق وزیر اعظم کی شبیہ کو خراب کرنے کی کوشش ہے۔ یاد رہے کہ منی کارنیکا میں رانی لکشمی بائی اور تھلاوی میں تامل ناڈو کی سابق وزیر اعلیٰ جے للیتا کا کردار ادا کرنے کے بعد یہ کنگنا رناوت کی تیسری بائیوپک ہے۔