پاک، بھارت عوام کے دل میں ایک دوسرے کےلیے پیار ہے، چرن جیت سنگھ

بھارتی پنجاب کے وزیراعلیٰ چرن جیت سنگھ کا کہنا ہے کہ پاکستان اور بھارت کے لوگوں کے دلوں میں ایک دوسرے کے لیے بے پناہ محبت ہے۔ پڑوسی ممالک کی محبت خطے میں پائیدار امن کا باعث بنے گی۔

بھارتی پنجاب کے وزیر اعلیٰ چرن جیت سنگھ کابینہ کے ارکان کے ہمراہ کرتار پور راہداری کے راستے گوردوارہ دربار صاحب پہنچے تو ڈھول کی تھاپ سے ان کا استقبال کیا گیا۔ کرتارپور کی سرزمین پر قدم رکھتے ہی وزیراعلیٰ اور ان کی اہلیہ نے سر جھکا لیا۔

انہوں نے کہا کہ وہ بابا گرو نانک کے جنم دن کی تقریبات میں شرکت کے لیے آئے ہیں، پاک بھارت دوستی اور بھائی چارہ خطے میں امن لائے گا۔

چیف منسٹر چرن جیت سنگھ نے دربار صاحب کا دورہ کیا۔ اپنے مختصر خطاب میں، انہوں نے وزیراعظم عمران خان کے کرتار پور راہداری کھولنے اور گوردوارہ بابا گرو نانک کی توسیع کے منصوبے کی تعریف کی۔

انہوں نے کہا کہ سکھ مذہب سے تعلق رکھنے والے لوگ حکومت پاکستان کی کوششوں کے شکر گزار ہیں۔

بھارتی وزیر اعلیٰ نے اپنی کابینہ اور اہل خانہ کے ساتھ لنگر ہال میں کھانا کھایا۔ مہمانوں کی تواضع دال چاول، سبزی، روٹی اور میٹھے چاول سے کی گئی۔

بابا گرو نانک کے جنم دن کی تقریبات عقیدت و احترام سے منائی جارہی ہیں۔ بابا گرو نانک نے ہمیشہ امن، محبت اور بھائی چارے کا درس دیا۔