وزیراعظم عمران خان کا پاراچنار جلسہ ملتوی

پی ٹی آئی کے ایم پی اے اقبال سید میاں نے کہا ہے کہ وزیر اعظم عمران خان کا دورہ پارا چنار خراب موسم کے باعث ملتوی کیا گیا ہے۔

پارا چنار میں جلسے کے لیے لگائے گئے اسٹیج سے ایم پی اے اقبال سید میاں نے وزیراعظم عمران خان کا دورہ ملتوی کرنے کا اعلان کیا۔

اقبال سید میاں کے اعلان کے بعد کارکنان جلسہ گاہ سے واپس آنا شروع ہو گئے ہیں۔

دوسری جانب ضلع کرم کے مختلف علاقوں میں بارش کا سلسلہ جاری ہے۔

خیال رہے کہ پاراچنار کے اسپورٹس کمپلیکس میں وزیراعظم عمران خان کے جلسے کی تمام تیاریاں مکمل کر لی گئی تھیں اور کارکنان کی پنڈال پہنچنا شروع ہو گئی تھی۔

پارٹی ذرائع کا کہنا ہے کہ ہال میں 40 ہزار افراد کے لیے نشستیں فراہم کی گئی تھیں جب کہ سیکیورٹی کے انتظامات سخت کیے گئے تھے۔