مقبوضہ وادی میں بھارتی ریاستی دہشتگردی بند کروائی جائے: حریت کانفرنس

مقبوضہ جموں و کشمیر کی کل جماعتی حریت کانفرنس نے عالمی برادری سے مقبوضہ علاقوں میں بھارتی ریاستی دہشت گردی بند کرنے کی اپیل کی ہے۔

کشمیر میڈیا سروس کے مطابق حریت کانفرنس نے کشمیریوں کے قتل عام کی مذمت کرتے ہوئے عالمی برادری سے مطالبہ کیا ہے کہ تنازعہ کشمیر کو اقوام متحدہ کی قراردادوں اور کشمیریوں کی امنگوں کے مطابق حل کیا جائے۔

رپورٹ کے مطابق گزشتہ روز پلوامہ میں دو کشمیری نوجوانوں کو شہید کیا گیا۔

رپورٹ میں یہ بھی کہا گیا ہے کہ یوم شہدائے کشمیر کے موقع پر کل مقبوضہ وادی میں مکمل ہڑتال کی جائے گی۔

ہڑتال کی کال حریت کانفرنس نے 1931 کے شہداء کو خراج عقیدت پیش کرنے کے لیے دی تھی۔

حریت کانفرنس نے ہڑتال کی کال دیتے ہوئے کہا ہے کہ کشمیری شہداء کی بے مثال قربانیوں کو رائیگاں نہیں جانے دیا جائے گا۔

خیال رہے کہ 13 جولائی 1931 کو سری نگر سینٹرل جیل کے باہر ڈوگرہ راجہ کی فوج نے 22 کشمیریوں کو شہید کردیا تھا۔