مسجد میں کلہاڑی سے حملہ، متعدد زخمی

کینیڈا کے شہر مسی ساگا میں ایک شخص نے مسجد پر کلہاڑی سے حملہ کر کے متعدد افراد کو زخمی کر دیا۔

غیر ملکی خبر رساں ادارے کے مطابق فجر کی نماز کے دوران ملزمان نے کلہاڑی سے حملہ کردیا جس کے نتیجے میں متعدد افراد زخمی ہوگئے۔

متاثرہ مسجد دارالتوحید اسلامک سینٹر کی انتظامیہ کی جانب سے جاری کردہ بیان کے مطابق نمازیوں نے 24 سالہ حملہ آور کو گرفتار کرکے پولیس کے حوالے کردیا ہے۔

دوسری جانب کینیڈا کے وزیراعظم جسٹن ٹروڈو نے مسجد پر کلہاڑی کے حملے کی شدید مذمت کی ہے۔

سماجی رابطے کی ویب سائٹ ٹوئٹر پر جاری کردہ ایک بیان میں کینیڈین وزیراعظم جسٹن ٹروڈو نے کہا کہ کینیڈا میں اس طرح کے تشدد کی کوئی گنجائش نہیں ہے۔

انہوں نے کہا کہ میں ان لوگوں کا بھی شکریہ ادا کرنا چاہتا ہوں جو آج صبح وہاں موجود تھے۔