لندن کے دورے کا مقصد سیاسی جوڑ توڑ نہیں ہے، جہانگیر ترین

لندن (مرتضیٰ علی شاہ) سابق وزیراعظم عمران خان کے قریبی ساتھی جہانگیر ترین نے کہا ہے کہ ان کا دورہ لندن نجی مقاصد کے لیے ہے اور اس دورے کا مقصد سیاسی جوڑ توڑ نہیں ہے۔ جنگ اور جیو سے گفتگو کرتے ہوئے ، انہوں نے مسلم لیگ (ن) اور پیپلز پارٹی کے رہنماؤں سے ان کی ملاقاتوں کے حوالے سے قیاس آرائیوں کو بے بنیاد قرار دیا۔ انہوں نے کہا کہ وہ طبی معائنہ اور دیگر مصروفیات کی وجہ سے 2 ہفتوں کے لیے لندن آئے ہیں۔ میرے ذہن میں اس دوران کسی سیاسی ملاقات کا کوئی منصوبہ نہیں ہے۔ میں یہاں اپنے ڈاکٹروں ، دوستوں اور ساتھیوں سے ملوں گا لیکن ذاتی طور پر۔ ۔ یہاں تک کہ جب ایک سال قبل جہانگیر ترین لندن پہنچے تو یہ قیاس آرائیاں عروج پر تھیں کہ وہ شریف خاندان سے ملاقات کریں گے ، لیکن دونوں فریقوں نے اس کی تردید کی اور ایسی کوئی ملاقات نہیں ہوئی۔ جہانگیر ترین نے تصدیق کی کہ وہ لندن میں دو ہفتے قیام کے بعد اپنے بیٹے کے ساتھ پاکستان واپس آئیں گے۔ برطانیہ میں لاک ڈاؤن کی پابندیوں میں نرمی اور برطانیہ کی جانب سے پاکستان کو ریڈ لسٹ سے نکالنے کے بعد موجودہ پاکستان مسلم لیگ نواز (پی ایم ایل این) اور پاکستان پیپلز پارٹی (پی پی پی) کے کئی رہنماؤں کی آمد متوقع ہے۔ لندن آزاد کشمیر کے دو سینئر سیاستدان پہلے ہی لندن میں قرنطینہ میں ہیں جبکہ مسلم لیگ (ن) کے کئی رہنما نواز شریف سے ملاقات کے لیے لندن جا رہے ہیں۔ پیپلز پارٹی کے کئی رہنماؤں کی لندن آمد متوقع ہے۔ پنجاب کے گورنر چوہدری سرور ، وزیر امور کشمیر شہریار آفریدی حال ہی میں یورپ میں تھے جبکہ مشیر خزانہ شوکت ترین ، اسٹیٹ بینک کے گورنر رضا باقر کے ہمراہ منگل کی شام تاجر برادری سے ملاقات کے لیے لندن پہنچے۔ جہانگیر ترین اس وقت لندن سے ایک گھنٹے کی مسافت پر نیوبری میں اپنے خاندان کے گھر پر ہیں ، جہاں وہ عام طور پر برطانیہ کے دورے کے دوران ٹھہرتے ہیں۔ پی پی پی کے ایک ذرائع نے بتایا کہ سابق گورنر پنجاب جلد لندن پہنچیں گے لیکن سیاسی ملاقات کے لیے نہیں۔ جہانگیر ترین کی لندن روانگی سے قبل ان کے بیٹے علی ترین نے ایف بی آر کی جانب سے جاری کردہ نوٹس کو چیلنج کیا تھا جس میں بیرون ملک 30 ملین ڈالر کے اثاثے چھپانے کا الزام لگایا گیا تھا۔ علی ترین نے ان الزامات کی تردید کی ، جبکہ ان کے والد نے کہا کہ انہیں پی ٹی آئی حکومت کے اندر ایک لابی نشانہ بنا رہی ہے۔