سعید غنی کے جماعت اسلامی، ایم کیو ایم، آفاق احمد پر الزامات

صوبائی وزیر اطلاعات و نشریات سعید غنی نے کہا ہے کہ ٹنڈو الہ یار میں قتل کی بنیاد پر لسانی فسادات کی سازش رچی جارہی ہے۔

کراچی میں میڈیا سے گفتگو کرتے ہوئے سعید غنی نے متحدہ قومی موومنٹ پاکستان (ایم کیو ایم)، آفاق احمد پر نفرت کی سیاست اور جماعت اسلامی پر لسانیت بولنے کا الزام لگایا۔

انہوں نے کہا کہ ٹنڈو الہ یار میں قتل کی بنیاد پر لسانی فسادات اور خونریزی دوبارہ نہیں ہونے دیں گے۔

صوبائی وزیر نے ٹنڈو الہ یار میں خواتین سے بدتمیزی کرنے والے اہلکاروں کے خلاف کارروائی کی یقین دہانی کرادی۔

انہوں نے کہا کہ جماعت اسلامی بھی تقسیم کی سازش کر رہی ہے اور سندھ حکومت کو ایک زبان کی نمائندہ اور دوسری زبان کی دشمن کے طور پر پیش کرنا زیادتی ہے۔

سعید غنی نے مزید کہا کہ جو قتل ہوا ہے اس کا تعلق ایم کیو ایم سے ہے، قاتل کا تعلق قوم پرست جماعت سے ہے، سمجھ نہیں آتی کہ سندھ حکومت بلاوجہ ہر معاملے میں کیوں ملوث ہے۔

انہوں نے یہ بھی کہا کہ مفرور ملزمان کو انصاف کے کٹہرے میں لانا پولیس کا کام ہے۔ ٹنڈو الہ یار میں نعرے لگاتے ہوئے تھانے پر حملہ کیا گیا۔

صوبائی وزیر اطلاعات کا کہنا تھا کہ مقتولین کے لواحقین کی جانب سے ایف آئی آر میں نام درج کیے گئے تھے۔

انہوں نے کہا کہ زبان درازی کی کوشش کی جارہی ہے، ایم کیو ایم نے ہمیشہ فساد پھیلایا، جس کا فائدہ اٹھایا، ایم کیو ایم نے یہاں لوگوں کو مارا۔

سعید غنی نے کہا کہ انہیں دکھ ہے کہ جماعت اسلامی بھی زبان زدعام ہے۔ آپ کو قانون پسند نہیں اس لیے قانون کی بات کریں۔