سابق چیف جسٹس ثاقب نثار سے منسوب نئی مبینہ آڈیو سامنے آگئی

سابق چیف جسٹس آف پاکستان جسٹس (ر) ثاقب نثار سے منسوب ایک نئی مبینہ آڈیو منظر عام پر آگئی ہے۔

اس آڈیو ٹیپ میں ثاقب نثار مبینہ طور پر کہہ رہے ہیں کہ عمران خان کے لیے جگہ بنانے پر نواز شریف کو سزا ملنی چاہیے۔

آڈیو ٹیپ میں وہ مبینہ طور پر تسلیم کر رہے ہیں کہ مریم نواز کو سزا بھگتنی پڑے گی، حالانکہ مریم نواز کے خلاف کوئی مقدمہ نہیں ہے۔

سابق چیف جسٹس ثاقب نثار کی خود سے منسوب آڈیو کلپ کی تردید

دوسری جانب سابق چیف جسٹس آف پاکستان جسٹس (ر) ثاقب نثار نے ان سے منسوب سوشل میڈیا پر گردش کرنے والے مبینہ آڈیو کلپ کی تردید کردی۔

جیو نیوز سے گفتگو کرتے ہوئے جسٹس (ر) ثاقب نثار نے کہا کہ یہ من گھڑت آڈیو مجھ سے منسوب کی گئی ہے جسے میں نے بھی سنا ہے۔

انہوں نے کہا کہ ایسی باتیں سامنے لائی جا رہی ہیں، یہ آواز میری نہیں، اس حوالے سے کبھی کسی کو ہدایات نہ دیں۔

جب جیو نیوز نے ان سے پوچھا کہ کیا وہ آڈیو کے معاملے پر کوئی قانونی نوٹس بھیجیں گے؟ جس پر سابق چیف جسٹس نے کہا کہ سوچ رہا ہوں قانونی کارروائی کروں یا نہیں۔