روٹی، کپڑا اور مکان 70ء کی طرح آج بھی اہم نعرہ ہے، بلاول بھٹو

پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ روٹی، کپڑا اور مکان کا نعرہ آج بھی اتنا ہی اہم ہے جتنا 70 کی دہائی میں تھا۔

ان خیالات کا اظہار چیئرمین پی پی پی نے بلاول ہاؤس لاہور میں پیپلز پارٹی میں شمولیت اختیار کرنے والوں سے ملاقات کے دوران کیا۔

انہوں نے پیپلز پارٹی میں شامل ہونے والوں کو مبارکباد دیتے ہوئے کہا کہ روٹی کپڑا اور مکان کا نعرہ آج بھی اتنا ہی اہم ہے جتنا 70 کی دہائی میں تھا۔

بلاول بھٹو زرداری نے مزید کہا کہ پیپلز پارٹی کی بنیاد لاہور میں رکھی گئی، ہم نے پنجاب، لاہور کا دل جیتنا ہے۔

انہوں نے کہا کہ پیپلز پارٹی نے ماضی میں پنجاب کے لوگوں کو نوکریاں دیں، یہاں کے لوگوں کو صرف پیپلز پارٹی ہی نوکریاں دے سکتی ہے۔

پی پی پی چیئرمین نے یہ بھی کہا کہ کسی سے ذاتی لڑائی نہیں، ہمارا مسئلہ عوام کے بنیادی حقوق کا ہے، پیپلزپارٹی حکومت کے لیے نہیں عوامی خدمت کے لیے سیاست کرتی ہے۔