ایف آئی اے میں ڈیپوٹیشن پر تعینات سندھ پولیس کے 39 افسران کو واپس بھیجنے کی تیاری

وفاقی تحقیقاتی ایجنسی (ایف آئی اے) سندھ پولیس کے 39 اہلکاروں میں سے بیشتر کو اپنے اصل محکموں میں واپس بھیجنے کی تیاری کر رہی ہے۔

اس حوالے سے ڈی جی ایف آئی اے ثنا عباسی نے گزشتہ ہفتے کراچی میں ایف آئی اے ڈائریکٹوریٹ کے دورے کے دوران ہدایات جاری کی تھیں۔

ذرائع کے مطابق ملک بھر کی پولیس سے وفاقی تحقیقاتی ایجنسی میں ڈیپوٹیشن پر آنے والے ملازمین کی کل تعداد 52 ہے جن میں سے 39 کا تعلق سندھ پولیس سے ہے۔

ڈائریکٹر ایف آئی اے سندھ عامر فاروقی کے مطابق وہ پولیس اہلکار جو دو سال سے زائد عرصے سے ایف آئی اے میں ہیں اور ان کی کارکردگی قابل ذکر نہیں ہے انہیں پولیس کو واپس بھیجا جا رہا ہے۔

عامر فاروقی نے کہا کہ تعیناتی محکموں سے ان افسران اور ملازمین کی کارکردگی پر رپورٹ طلب کی گئی ہے۔ صرف اچھی کارکردگی دکھانے والے پولیس افسران کو ایف آئی اے میں رکھا جائے گا۔ ان افسران میں 26 پولیس انسپکٹر اور 13 سب انسپکٹر شامل ہیں۔