آرمی چیف نے لیفٹیننٹ جنرل نگار جوہر کو بیجز لگائے

آرمی چیف جنرل قمر جاوید باجوہ نے آرمی میڈیکل کور ایبٹ آباد کا دورہ کیا اور کرنل کمانڈنٹ آرمی میڈیکل کور لیفٹیننٹ جنرل نگار جوہر کو بیجز پیش کیے، لیفٹیننٹ جنرل نگار جوہر آرمی میڈیکل کور کی پہلی خاتون کرنل کمانڈنٹ ہیں۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے آرمی میڈیکل کور (اے ایم سی) ایبٹ آباد کا دورہ کیا۔

تقریب سے خطاب کرتے ہوئے آرمی چیف نے کہا کہ پہلی تھری اسٹار خاتون جنرل آفیسر کی ترقی پاک فوج اور ملک کے لیے باعث فخر ہے۔

آرمی چیف نے کہا کہ اے ایم سی نے ہمیشہ قدرتی آفات کے دوران ڈیوٹی کی پکار پر لبیک کہا۔

جنرل قمر جاوید باجوہ نے جنگ اور امن کے دوران طبی سہولیات کے اعلیٰ معیار کو برقرار رکھنے پر میڈیکل کور کی خدمات کو سراہتے ہوئے کہا کہ اے ایم سی نے اندرون اور بیرون ملک اپنی بہترین خدمات سرانجام دیں۔

آرمی چیف نے کہا کہ ہمارے ڈاکٹرز اور پیرا میڈیکس کورونا وبا کے دوران صف اول کے جنگجو رہے ہیں جب کہ انہوں نے پاکستان کے عوام کی حفاظت اور فلاح و بہبود کے لیے مثالی عزم کے ساتھ خدمات سرانجام دیں۔

آئی ایس پی آر کے مطابق آرمی چیف نے یادگار پر پھول بھی چڑھائے۔