اسلم بھوتانی کی آصف زرداری سے ملاقات

بلوچستان کے رکن قومی اسمبلی اسلم بھوتانی نے پیپلز پارٹی کے شریک چیئرمین اور سابق صدر آصف علی زرداری سے ملاقات کی ہے۔

ذرائع نے دونوں رہنماؤں کے درمیان ملاقات کی تصدیق کی ہے۔

ذرائع کا کہنا ہے کہ اسلم بھوتانی کی جانب سے تحریک عدم اعتماد کے لیے اپوزیشن جماعتوں کی حمایت کا اعلان متوقع ہے۔

ذرائع کا یہ بھی کہنا ہے کہ اسلم بھوتانی اور بلاول بھٹو زرداری کی مشترکہ پریس کانفرنس جلد اسلام آباد میں متوقع ہے۔

دوسری جانب وزیراعظم عمران خان نے چوہدری پرویز الٰہی کو وزیراعلیٰ پنجاب نامزد کردیا ہے۔

مسلم لیگ (ق) کے پرویز الٰہی گروپ نے پاکستان تحریک انصاف (پی ٹی آئی) کے عبدالعلیم خان گروپ سے رابطہ کیا ہے۔

مسلم لیگ (ق) کے رہنماؤں نے عبدالعلیم خان گروپ کے ترجمان صوبائی وزیر میاں خالد محمود سے مذاکرات کیے ہیں۔

اس حوالے سے میاں خالد محمود کا کہنا ہے کہ تمام دوستوں سے مشاورت کے بعد جواب دیں گے۔

ادھر چوہدری پرویز الٰہی نے بھی ارکان پنجاب اسمبلی سے ملاقاتوں کا سلسلہ شروع کر دیا ہے۔

ذرائع کا کہنا ہے کہ چوہدری پرویز الٰہی سے پیر سید علی عباس شاہ اور دیگر اراکین اسمبلی نے ملاقات کی۔

ذرائع کا کہنا ہے کہ ملاقات کے دوران چوہدری پرویز الٰہی نے اراکین سے باضابطہ حمایت کی درخواست کی۔

ذرائع کا مزید کہنا ہے کہ ارکان پنجاب اسمبلی نے پرویز الٰہی کو مکمل تعاون کی یقین دہانی کرائی ہے۔

ذرائع کا یہ بھی کہنا ہے کہ پنجاب اسمبلی کے مزید ارکان بھی آج چوہدری پرویز الٰہی سے ملاقات کریں گے۔

قبل ازیں مسلم لیگ ق کے رہنما اور وفاقی وزیر مونس الٰہی نے نئے قائد ایوان کے انتخاب کے لیے مسلم لیگ ن کے متعدد ارکان سے رابطہ کیا تھا۔

دوسری جانب مسلم لیگ ن کے سینئر رہنماؤں نے پنجاب کے سابق سینئر وزیر اور پاکستان تحریک انصاف (پی ٹی آئی) کے علیم خان گروپ کے سربراہ عبدالعلیم خان سے رابطہ کیا۔

ذرائع کا کہنا ہے کہ عبدالعلیم خان سے رابطہ کرنے والوں میں مسلم لیگ ن پنجاب کے صدر رانا ثناء اللہ خان بھی شامل تھے۔

ذرائع نے یہ بھی بتایا کہ مسلم لیگ ن نے اگلے انتخابات میں پی ٹی آئی کے منحرف ارکان کو پارٹی ٹکٹ دینے کی پیشکش کی ہے۔

وزیراعظم عمران خان کی جانب سے مسلم لیگ (ق) کے رہنما چوہدری پرویز الٰہی کی بطور وزیراعلیٰ پنجاب نامزدگی کے معاملے پر جہانگیر ترین گروپ اور علیم خان گروپ نے آج اپنے اپنے اجلاس طلب کر لیے۔

خیال رہے کہ گزشتہ روز وزیراعظم عمران خان نے وزیراعلیٰ پنجاب عثمان بزدار کا استعفیٰ منظور کرتے ہوئے ان کی جگہ چوہدری پرویز الٰہی کو نامزد کرنے کا اعلان کیا تھا۔